Er ikkje nettsida di universelt utforma? No har kontrollane byrja
Du risikerer dagbøter om alt ikkje er på stell.
Publisert
Verksemder i offentleg sektor skal følge nye lovpålagde krav om universell utforming av IKT. Dei skal også publisere tilgjengelegheitserklæring på sine nettstader. Erklæringa viser om nettstaden følger krava.
Denne viser status for i kva grad verksemde følger krava om universell utforming av IKT og skal redusera digitalt utanforskap.
Dette er eit nytt krav for offentleg sektor i år.
I mars sendte Uu-tilsynet ut dei første pålegga om å opprette tilgjengelegheitserklæring.
Pålegga vart sendt til utvalde verksemder som ikkje hadde publisert erklæringar innan fristen 1. februar.
Dei fem utvalde var
- Statens Havarikommisjon
- Politiets sikkerhetstjeneste (PST)
- Riksmekleren
- Justervesenet
- Øksnes kommune
Manglande erklæring vil kunne føre til sanksjonar frå tilsynet i form av dagmulkter.
Dei fekk frist til 12. april om å få på plass erklæringane sine, med varsel om dagbøter dersom denne fristen ikkje vart nådd.
Alle har no oppretta erklæring i uustatus.no og publisert, og tilsynet avsluttar derfor sakene.
– Vi er glade for at verksemdene har teke dette på alvor, og fått erklæringar på plass, seier Malin Rygg, tilsynsdirektør i Uu-tilsynet.
– Tilgjengelegheitserklæring er eit viktig steg i arbeidet som skal skje i offentlege verksemder for å sikre at dei digitale løysingane kan brukast av alle. Det er viktig at offentleg sektor digitaliserer på ein måte som inkluderer og ikkje skapar digitalt utanforskap,seier ho.
Tilsynet kjem til å halde fram med å følge opp verksemder som ikkje har dette på plass, og verksemder som er seint ute, må rekne med å få eit varsel i løpet av våren.
