Irriterer seg over Statens naudmeldingar
No krev mållagsleiaren at det vert ordna opp snarast.
Publisert
Sist oppdatert
– Tyskarane står ikkje i Drøbaksundet, og dei har all verdas tid til å laga ein nynorsk versjon, seier ein irritert Peder Lofnes Hauge til Dagbladet.
Snakk om krasjlanding. Kva er vitsen med slike varsel om det berre er enno eit utslag av det statlege bokmålsveldet. Nokon må gå. https://t.co/9lH7hFuMBl
— Peder Lofnes Hauge (@PederHauge) June 14, 2023
Onsdag denne veka testa politiet sitt nye naudmeldingssystem og telefonar over heile landet ulte og folk fekk opp ei melding med informasjon om kva dette var for noko.
Meldinga kom på både bokmål og engelsk.
Men eit språk mangla, nynorsk.
Det får Lofsnes Hauge, som er leiar i Noregs Mållag til å reagera.
På Twitter skriv han at det er ei krasjlanding og meiner det berre er enno eit utslag av det statlege bokmålsveldet.
– Eg forventar at styresmaktene får på plass ei naudvarsling på både bokmål og nynorsk, seier mållags-leiaren til avisa.
Åse Wetås, som er direktør i Språkrådet, seier til Dagbladet at dei vil følga dette opp, medan seniorrådgjevar i DSB, Henriette Magnussen, skriv i ein mail til Dagbladet at dei vurderer å ha nynorsk som hovudspråk ved neste test av systemet.
