Slik vart Sunnfjord årets klarspråk-kommune
– Me bygde den nye kommunen på klarspråk.
Publisert
Sist oppdatert
(Bergen): – Det at me er ein ny kommune trur me er litt av grunnen til at me er der me er i dag.
Det seier Annette Sollid i Sunnfjord kommune.
Ho var onsdag i Bergen for å snakka til 120 offentleg tilsette kommunikatørar om korleis dei klarte å få sikra seg Klarspråkprisen for 2023.
Klarspråkprisane går til aktørar i offentleg sektor som har gjort ein ekstraordinær innsats på feltet.
Bygde kommunen på klarspråk
Sunnfjord kommune vart skipa den 1. januar 2020 då Førde, Naustdal, Gaular og Jølster kommunar slo seg saman.
Men då fire kommunar skulle slåast saman måtte ein gjera ein innsats på førehand.
– Innbyggarane må ha tillit til prosessane og høve til medverknad, seier Sollid og peikar på at det var jo ikkje politikarar eller administrasjonen som skulle laga den nye storkommunen.
Difor måtte dei ut og snakka med innbyggarane i den nye kommunen.
– Me bygde den nye kommunen på klarspråk, seier ho.
Blant tinga dei gjorde var å etablera over 100 arbeidsgrupper, kursa tilsette over ein låg sko og laga dokument som innbyggarane skulle forstå.
Men det betyr ikkje at alt gjekk problemfritt føre seg.
Men når det kjem til problem, har Sollid ei klar oppmoding til uroa kommunalt tilsette.
– Ta tak i problema!
– Problema må ein løfta opp, adressera og ta tak i, seier ho.
Sollid dreg fram nokre av utfordringane som dukka opp.
Ein ting er at administrasjonen kjem rett før politiske møter og skal ha korrektur på hundrevis av sider med sakspapirSS, noko ho seier dei ikkje har ressursar til å få ekstern hjelp til på kort tid.
Eit anna problem dei støtte på var at dei tilsette sa at det var vanskeleg å prioritera klarspråk i kvardagen, noko ho trur betyr at dei ikkje har skjønt kva klarspråk er.
Ho seier og at det er viktig å passa på truverdet.
– Me kan ikkje berre ha gladsaker i nyhendearkivet, me må eiga det som ikkje er så bra og, elles kan ikkje innbyggarane ha truverd til oss når me kjem med viktige beskjedar dei bør følga, seier ho.
Ho seier det er viktig å våga å fortelja heile historia.
– Ikkje vent på at avisa skal gjera konfliktmaterialet tydleg. Eig innhaldet, få innbyggarane på bana før vedtaket er fatta. For dette kjem på bordet ein vakker dag, det er ikkje vits å venta på det, seier ho.
Kommunikasjonsavdelinga i kommunen består av åtte personar, men Sollid er heilt klar på at klarspråkarbeid ikkje er noko kommunikasjonsavdelinga skal jobba med åleine.
Kuppa jolakalendaren
Difor har dei ei arbeidsgruppe på fire personar som jobbar med klarspråk, der fleire er henta frå andre avdelingar.
– For å sitja i arbeidsgruppa treng du ikkje vera så veldig god i språk, men du må forstå at det me seier skal bli forstått, seier ho.
Ho peikar og på at einingane har sjølve ansvar for arbeid med klarspråk, men dei kan få støtte og rettleiing understrekar ho.
Men det betyr at dette arbeidet må få prioritet ute i avdelingane, og ho understrekar at prioritet ikkje er det same som forankring.
– Der det har prioritet hjå kommunalsjefane får me det til, der smittar det nedover. Men ta ikkje lett på forankring, sørg for prioritet!, understrekar ho.
Dei jobbar og hardt i Sunnfjord for å halda klarspråk i medvitet til dei 2200 tilsette.
– Så me masar masse og skjuler det som noko veldig gøy, seier ho.
Dei to siste åra har dei kuppa jolakalenderen i kommunen.
– Og ingen har klaga, fortel ho.
Måla deira for kvar ting dei gjer er å gje dei tilsette ei aha-oppleving, gje dei små drypp eller påminningar for å halda på merksemda deira.
– Aldri la den kvile.
